ब्र आणि भिन्न ह्या अतिशय उत्तम आणि लोकप्रिय कादंबरी लिहिण्याऱ्या लेखिकेची अजून एक कादंबरी म्हणून मला ह्या पुस्तकाबद्दल खूप उत्सुकता होती. पण आश्चर्य म्हणजे मला ह्या पुस्तकाचा रिव्ह्यू कुठेही नजरेस पडला नाही, त्यामुळे कदाचित मी हे पुस्तक वाचताना माझ्या मनाची अपेक्षा पाटी अगदी कोरी होती.

पुस्तकाचं कथासूत्र थोडक्यात सांगायचं तर ही कहाणी आहे पदमजा सप्रे हया अभिनेत्रीची; जी मराठी नाट्यसृष्टी ते हिंदी चित्रपट असा अभिनयाचा प्रवास करते आणि त्याबरोबरच एक उन्मुक्त, स्वच्छन्दि वैयक्तिक आयुष्य जगते. ज्यांना मराठी साहित्य, नाटक आणि हिंदी चित्रपट ह्यांची थोडीबहुत माहिती आहे, त्यांना इथे बरीच खऱ्या जगातील साम्यस्थळे सापडू शकतील.